|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Мемлекет басшысының халықтың тұрғын үй мәселелерін шешу жөніндегі тапсырмасы аясында Ақмола облысында облыс әкімі Ермек Маржықпаевтың төрағалығымен "Отбасы банк" АҚ өкілдерімен кеңес өтті, деп хабарлайды Dauletten.kz сайты Inbusiness.kz-ке сілтеме беріп.
Жиын барысында өңір басшысы жастарға арналған тұрғын үй жобасы қажет екенін айтты.
"Отбасы Банк" АҚ Ақмола облыстық филиалының директоры Алмат Нұрахметовтың айтуынша, жаңа бағдарламаның мақсаты - 35 жасқа дейінгі жастарды жеке тұрғын үймен қамтамасыз ету.
"Бүгін біз "Ақмола жастары" жаңа өңірлік бағдарламасын таныстырамыз, жеңілдікті кредиттеу мөлшерлемесі түпкілікті қарыз алушы үшін жылдық 5 пайыз болады. Ең төменгі бастапқы жарна -10 пайыз. Бұл бағдарламаның бірегейлігі - барлық шарттарды жергілікті атқарушы органдар пысықтайды. Ең ұзақ мерзім - 19 жылға дейін, ең көп несие сомасы -15 млн теңеге дейін", - деп атап өтті "Отбасы банк" АҚ АОФ директоры.
Өңір басшысы жас ақмолалықтар үшін бағдарламаның маңыздылығын атап өтіп, пилот ретінде облыс орталығынан жаңа тұрғын үй бағдарламасын іске асыруды бастауды тапсырды.
"Алғашқы болып Көкшетау қаласы болады, өйткені жастардың басым бөлігі осында тұрады. Сондай - ақ, жобаға жұмысшы мамандықтарда, денсаулық сақтау және білім беру салаларында жұмыс істейтіндерді қосу мүмкіндігін қарастыруды ұсынамын", - деп атап өтті Ермек Маржықпаев.
Облыстағы жастардың үлесі 153 мың адамнан асады, бұл облыс халқының жалпы санының 20% құрайды. Қалада 68 510 жас, ал ауылдық жерлерде 84 872 жас тұрады.
Фото: info.homsters.kz
