Жаңалықтар

Экологтар Балқаш мыс зауытына 6,3 млн теңгеден астам айыппұл салды

12.08.2026

мин

0

52

Сурет: Oркен- Media

Қарағанды облысының экологтары Балқаш мыс балқыту зауытында жоспардан тыс тексеру жүргізіп, атмосфераға тараған зиянды заттардың рұқсат етілген мөлшерден асып кеткенін анықтады. Нәтижесінде кәсіпорынға 6,3 млн теңгеден астам айыппұл салынды, — деп хабарлайды Dauletten.kz.

Балқаш мыс балқыту зауытында экологиялық талаптардың сақталуына қатысты жоспардан тыс тексеру жүргізілді. Тексеруді Қарағанды облысының экология департаменті ұйымдастырған.

Ведомство мәліметінше, тексеру барысында «Kazakhmys Smelting» ЖШС-нің өндірістік алаңдары, технологиялық жабдықтары, газ тазарту жүйелері және атмосфераға шығарындылар шығаратын көздері қаралған.

Мамандар өндірістік процестерге аспаптық бақылау жүргізіп, шығатын газдардан арнайы сынамалар алған. Зерттеу нәтижелері атмосфераға таралатын бірқатар ластаушы заттардың көлемі белгіленген рұқсат етілген шектен жоғары болғанын көрсетті.

Экологтардың алдын ала қорытындысына сәйкес, технологиялық жабдықтардың тиісті деңгейде жұмыс істемеуі ауаның қосымша ластануына әсер еткен.

Анықталған заңбұзушылықтарға байланысты кәсіпорынға әкімшілік шаралар қолданылды. Салынған айыппұлдардың жалпы көлемі 6 363 805 теңгені құрады.

Бұл жағдай өңірдегі ірі металлургиялық кәсіпорындардың экологиялық қауіпсіздігіне қатысты мәселені қайта көтеріп отыр. Сарапшылардың пікірінше, мұндай тексерулердің басты мақсаты айыппұл салу ғана емес, өндірістік процестердің қоршаған ортаға әсерін азайту және ауа сапасына тұрақты бақылау орнату болуы тиіс.

Қазіргі уақытта экология департаменті кәсіпорынның анықталған кемшіліктерді жою және шығарындыларды нормативтік талаптарға сәйкестендіру бойынша қандай шара қабылдайтынын бақылауда ұстап отыр.