Жаңалықтар

Уақтылы төлейтіндерге жеңілдік: Қазақстанда несие шарттары өзгеруі мүмкін

30.04.2026

мин

3

1256

Сурет: inbusiness.kz

Қазақстанда несиесін уақытында өтейтін азаматтар үшін пайыздық мөлшерлемені төмендету қарастырылып жатыр. Ал төлем тәртібін бұзатындар үшін талаптар күшейтілуі ықтимал, — деп хабарлайды Dauletten.kz.

Мәжіліс депутаты Айтуар Қошмамбетов елде халыққа кредит беру мәселесі ұзақ жылдан бері талқыланып келе жатқанын мәлімдеді. Оның айтуынша, бұл бағытта жүйелі өзгерістер енгізу қажеттігі туындап отыр.

Депутат келтірген деректерге сәйкес, Қазақстанда бір азаматтың бірнеше несие алуы жиі кездеседі. Орта есеппен қазақстандықтардың мойнында екі-үш кредиттен бар. Бұл жағдай кредит саясатын қайта қарауды талап етеді.

Осыған байланысты биылғы шілде айынан бастап кредит беру талаптарын күшейту жоспарланған. Дегенмен жаңа талаптар барлық азаматтарға бірдей қолданылмайды.

Қошмамбетовтың айтуынша, несиесін уақытында төлейтін азаматтар үшін пайыздық мөлшерлемені төмендету мүмкіндігі қарастырылып жатыр. Ал керісінше, төлем тәртібін сақтамайтын қарыз алушылар үшін талаптар қатаңдатылмақ.

Сонымен қатар депутат бұл мәселені тек заңнамалық өзгерістермен шешу жеткіліксіз екенін атап өтті. Оның пікірінше, қоғамда қаржылық мәдениетті қалыптастыру маңызды.

Ол кей азаматтардың қажетсіз шығындарға, соның ішінде жаңа смартфон сияқты тауарларға несие рәсімдейтінін сынға алып, қаржылық шешімдер саналы түрде қабылдануы тиіс екенін айтты.

Сондай-ақ қаржылық сауаттылықты мектеп қабырғасынан бастап үйрету қажеттігіне назар аударды. Депутаттың сөзінше, әр адам табысынан артық шығын жасамауы керек.

Айтуар Қошмамбетовтің өзі де қажет болған жағдайда несие алатынын айтты. Ол ипотека мен автокөлікке кредит рәсімдегенін, алайда мұндай шешімдерді әрдайым қаржылық мүмкіндігін ескере отырып қабылдайтынын жеткізді.

Жалпы, депутат кредит саясатын жетілдірумен қатар, халықтың қаржылық сауаттылығын арттыру басты міндеттердің бірі екенін атап өтті.