| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Қазақстанда медициналық қызметке жұмсалатын жеке шығын көлемі жыл сайын артып келеді. Бұл мәселені Құрылтайдағы Әлеуметтік-мәдени даму комитетінің төрағасы Асхат Аймағамбетов көтерді, - деп хабарлайды Dauletten.kz.
Міндетті әлеуметтік медициналық сақтандыру (МӘМС) жүйесін дамытуға арналған отырыста депутат халықтың медициналық көмекке қол жеткізуі әлі де өзекті мәселе болып отырғанын айтты.
Асхат Аймағамбетовтің сөзінше, азаматтармен кездесулер барысында медициналық сақтандыру жүйесіне қатысты шағымдар жиі айтылады. Әсіресе, емделуге кететін шығынның артуы мен медициналық қызметтердің қолжетімділігі тұрғындарды алаңдатып отыр.
– Шынын айтсақ, сайлаушылармен кездескен кезде, МӘМС мәселесі жиі көтеріліп жатады. Медициналық көмекке қолжетімділік тақырыбы өте көп көтеріледі. Жағдай қиындап барады. Тіпті, азаматтардың өз қалтасынан төленетін қаражаты жыл сайын өсіп жатыр, – деді депутат.
Отырыста денсаулық сақтау саласын цифрландыру, қаржының ашықтығын қамтамасыз ету және сыбайлас жемқорлық тәуекелдерін азайту мәселелері де талқыланды.
Комитет төрағасы Әлеуметтік медициналық сақтандыру қорына қатысты бұған дейін қабылданған шешімдер мен мемлекеттік органдардың міндеттемелеріне тоқталды. Оның айтуынша, қорды Қаржы министрлігіне беру кезінде үшжақты келісім жасалып, Денсаулық сақтау және Цифрландыру министрліктеріне нақты міндеттер жүктелген.
Алайда қордың құрылғанына он жылға жуық уақыт өтсе де, медициналық сақтандыру жүйесіне қатысты мәселелер әлі күнге дейін шешімін толық таппаған.
Айта кетейік, бұған дейін Денсаулық сақтау бірінші вице-министрі Тимур Сұлтанғазиев Қазақстанда 2,8 миллионға жуық азаматтың МӘМС жүйесінен тыс қалып отырғанын мәлімдеген.