Жаңалықтар

Алты жұмысшы қаза тапқан ферма: Павлодарлық депутаттың кәсіпорнына қатысты шешім шықты

02.09.2026

мин

0

108

Сурет: stan kz

Павлодар облысындағы Aqtogai Milk кәсіпорнында алты жұмысшының өмірін қиған қайғылы оқиғаға қатысты арнайы комиссия қорытынды шығарды. Тергеу нәтижесінде кәсіпорынның кінә дәрежесі 100% деп белгіленді, — деп хабарлайды Dauletten.kz.

Павлодар облысының Ақтоғай ауданында алты жұмысшының өмірін қиған өндірістік апатқа қатысты арнайы комиссия өз қорытындысын жариялады. Қайғылы жағдайдың негізгі себебі ретінде еңбек қауіпсіздігі талаптарының сақталмауы көрсетілген.

Еңбек және халықты әлеуметтік қорғау министрлігінің мәліметінше, оқиға кезінде жұмысшылар құдықта қызмет көрсету жұмыстарын атқарған. Алдымен олардың біреуі күкіртсутектен уланып, есінен танып қалған.

Әріптесін құтқаруға әрекет жасаған өзге жұмысшылар да кезекпен құдыққа түскен. Нәтижесінде олардың барлығы улы газдан зардап шегіп, алты адам қаза тапты.

Арнайы комиссия тергеу барысында кәсіпорында қауіпсіздікке қатысты бірқатар талаптың орындалмағанын анықтаған. Атап айтқанда, жұмысшылар қауіптілігі жоғары жұмыстарды қауіпсіз орындау тәртібі бойынша тиісті дайындықтан өтпеген.

Бұдан бөлек, қызметкерлер қажетті жеке қорғаныс құралдарымен қамтамасыз етілмеген. Құдықтағы жұмыстардың ұйымдастырылуы да қауіпсіздік талаптарына сәйкес болмаған. Әсіресе апат кезінде және адамдарды құтқару барысында қажетті қауіпсіздік шаралары сақталмаған.

Комиссия қорытындысында жұмыс берушінің жауапкершілігіне қатысты нақты баға берілді.

- Үкіметтік комиссияның жұмысы қорытындысы бойынша жұмыс беруші “Aqtogai Milk” ЖШС-нің кінә дәрежесі 100% деп белгіленді, – деп мәлімдеді министрлік.

Тергеу барысында оқиғаның себептері мен мән-жайы, сондай-ақ оған жауапты лауазымды тұлғалар анықталған. Комиссия еңбек қауіпсіздігі саласындағы анықталған заң бұзушылықтарды жою және осындай жағдайлардың қайталануына жол бермеу бойынша ұсыныстар әзірледі.

Министрлік жабық кеңістіктерде, соның ішінде құдықтарда, резервуарлар мен түрлі ыдыстардың ішінде жұмыс істейтін қызметкерлердің қауіпсіздігіне ерекше назар аудару қажеттігін атап өтті. Мұндай жұмыстарға жіберілетін мамандар алдын ала оқытылып, қорғаныс құралдарымен қамтамасыз етілуі және төтенше жағдай кезінде қалай әрекет ету керегін білуі тиіс.

Еске салайық, қайғылы оқиға 20 шілдеде Aqtogai Milk кәсіпорнының аумағында болған. Жабдықтарға қызмет көрсету кезінде алты жұмысшы қаза тауып, тағы бір адам ауруханаға жеткізілген.

Қаза болғандардың арасында бір отбасының әкесі мен екі ұлы — Бауыржан Мұхаммед, оның ұлдары Дархан және Дәулет болған. Сонымен қатар Евгений Яроцкий, Жұмабек Қайдаров және Рахат Расул көз жұмды.

Кәсіпорын иесі, Павлодар облыстық мәслихатының депутаты әрі кәсіпкер Александр Терентьев жұмысшылардың қаза болғанын растаған. Оның айтуынша, компания марқұмдардың отбасыларына қажетті көмек көрсетеді.