|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Алматыда жеңіл рельсті көлік (LRT) жобасына қатысты техникалық-экономикалық негіздеме әзірленді. Құжатқа сәйкес, алғашқы желінің нақты бағыты айқындалып, құрылыс 2027 жылы басталуы мүмкін, - деп хабарлайды Dauletten.kz.
Енді басты сұрақ – бұл жоба шаһардағы көлік кептелісін шеше ала ма?
Жаңа негіздемеге сәйкес, LRT депосы ЖЭО-2 аумағынан шығысқа қарай, Фариза Оңғарсынова, Мөңке би және Бауыржан Момышұлы көшелерінің аралығында орналасады. Бұл нысан болашақ желінің техникалық қызмет көрсету орталығы болмақ.
Жылдам рельсті көліктің алғашқы желісі деподан басталып, Бауыржан Момышұлы көшесімен оңтүстікке қарай Төле би көшесіне дейін созылады. Одан әрі бағыт Төле би көшесі арқылы шығысқа қарай жалғасып, Абылай хан даңғылына шығады.
Маршрут осы жерден солтүстік бағытқа бұрылып, Абылай хан даңғылы арқылы Алматы-2 теміржол вокзалына дейін жетеді. Соңғы аялдама «Райымбек батыр» көлік-ауысып отыру торабы маңында орналасады. Бірінші желінің жалпы ұзындығы 17,893 шақырымды құрайды.
Айта кетейік, Алматыда LRT салу бастамасы 2018 жылдан бері талқыланып келеді. Алғашқы жоба нұсқасында екі бағыт қарастырылып, ұзындығы 22,7 шақырым болатын және 37 станциядан тұратын желі салу жоспарланған еді. Қазіргі нұсқада жоба параметрлері қайта қаралып, нақты бір желіге басымдық беріліп отыр.
Сарапшылардың пікірінше, LRT іске қосылған жағдайда қаладағы қоғамдық көлік жүйесіне түсетін жүктеме азайып, жекеменшік автокөлік ағыны қысқаруы мүмкін. Алайда жобаның тиімділігі оның сапалы жүзеге асуына және көлік инфрақұрылымымен үйлесімді интеграциялануына тікелей байланысты болмақ.
Егер құрылыс 2027 жылы басталса, бұл Алматының көлік жүйесіндегі ең ірі инфрақұрылымдық жобалардың біріне айналуы мүмкін. Дегенмен жоба қаладағы кептеліс мәселесін шынайы шешуі үшін оның құрылыс мерзімі, қаржыландыруы және көлік жүйесіне тиімді ықпалдасуы шешуші рөл атқарады.
