Жаңалықтар

223 миллион теңге: ауруханаға бөлінген қаржыны талан-таражға салғандар кімдер?

11.09.2026

мин

0

72

Сурет: Elordainfo.kz

Жаңаөзен қалалық ауруханасында күйік бөлімшесін ашуға арналған 223 млн теңгенің 131 миллионы мақсатсыз жұмсалды деген күдік бар. Қаржылық мониторинг агенттігі қылмыстық істі тергеп жатыр, — деп хабарлайды Dauletten.kz.

Маңғыстау облысында Жаңаөзен қалалық ауруханасына бөлінген қомақты қаражатқа қатысты қылмыстық іс тергеліп жатыр. Қаржылық мониторинг агенттігінің мәліметінше, әңгіме күйік бөлімшесін ашуға арналған 223 млн теңге демеушілік қаражат туралы болып отыр.

Қаражатты «ҚазМұнайГаз» медициналық жабдық сатып алуға бөлген. Алайда тергеу нұсқасына сәйкес, бастапқы жоспар өзгеріп, Бірыңғай дистрибьютор арқылы сатып алу тәртібін айналып өту үшін басқа жол қолданылған.

Нәтижесінде құны 210 млн теңге деп көрсетілген небәрі екі күйікке қарсы төсек сатып алынған.

Алайда тергеу барысында аталған жабдықтардың нақты құны шамамен 92 млн теңге болғаны анықталған. Осыдан кейін қалған 131 млн теңге қайда кеткен деген сұрақ туындаған.

Қаржылық мониторинг агенттігінің болжамынша, бұл қаражат үлестес компаниялар арқылы қолма-қол ақшаға айналдырылып, схемаға қатысушылар арасында бөлінуі мүмкін.

Іс бойынша аурухана директорының орынбасары, «Жарылқау» қорының басшысы, Жаңаөзен әкімінің бұрынғы орынбасары және жабдық жеткізуші күдікке ілінген.

Қазір үш күдікті қамауға алынған. Сонымен қатар олардың мүлкіне, атап айтқанда екі пәтер, екі үй және автокөлікке тыйым салынған.

Тергеу әлі жалғасып жатыр. Сондықтан 131 млн теңгенің нақты қалай және кімнің пайдасына жұмсалғаны сотқа дейінгі тергеу нәтижесінде анықталуы тиіс.

Бұл істегі назар аударарлық жайт – бастапқыда медициналық бөлімшені қажетті жабдықпен қамтамасыз етуге бағытталған 223 млн теңгенің басым бөлігі екі ғана медициналық төсек сатып алуға кеткені. Енді тергеу осы шешімнің қалай қабылданғанын және қаражат қозғалысының қай жерде өзгергенін анықтауы керек.