Жаңалықтар

Аида Балаева жаңа жоғары қызметке тағайындалды

31.08.2026

мин

0

121

Сурет: Vlast.kz

Аида Балаева Қазақстан Республикасы Қауіпсіздік Кеңесі Төрағасының орынбасары болып тағайындалды. Мемлекеттік қызметтегі еңбек жолын 1999 жылы бастаған Балаева осы жылдар ішінде әкімдік пен Президент Әкімшілігіндегі бірқатар жоғары лауазымды қызметтерді атқарған, — деп хабарлайды Dauletten.kz.

Мемлекет басшысының Жарлығымен Аида Ғалымқызы Балаева Қазақстан Республикасы Қауіпсіздік Кеңесі Төрағасының орынбасары қызметіне тағайындалды.

Аида Балаеваның мемлекеттік қызметтегі жолы 1999 жылдан басталады. Алғашқы жылдары Алматы облысының ақпарат және қоғамдық келісім саласында түрлі қызмет атқарып, бөлім маманынан бөлім басшысына дейін көтерілген. Кейін Алматы қаласының ішкі саясат құрылымдарында жұмыс істеді.

2008 жылы Астана қаласының ішкі саясат басқармасын басқарды. Ал 2010-2014 жылдары елорда әкімінің орынбасары қызметін атқарды. 

Балаеваның мансабындағы келесі кезең Президент Әкімшілігімен байланысты. 2014-2019 жылдары Президент Әкімшілігінің ішкі саясат бөлімін басқарды. 2019-2020 жылдары Президенттің көмекшісі әрі Президент Әкімшілігіндегі өтініштерді қарауды бақылау бөлімінің меңгерушісі болды. 

2020 жылы Ақпарат және қоғамдық даму министрі болып тағайындалып, бұл қызметті 2022 жылға дейін атқарды. Кейін Президент Әкімшілігі басшысының орынбасары қызметіне ауысты.

2023 жылғы қыркүйекте Балаева Мәдениет және ақпарат министрі болып тағайындалды. Ал 2025 жылғы 1 желтоқсанда оған Премьер-министрдің орынбасары – Мәдениет және ақпарат министрі лауазымы жүктелді.

Осылайша, Аида Балаеваның жаңа қызметке дейінгі еңбек жолы негізінен ішкі саясат, ақпарат, қоғамдық коммуникация және мемлекеттік басқару бағыттарымен байланысты болды.

Енді ол Қазақстан Республикасы Қауіпсіздік Кеңесі Төрағасының орынбасары ретінде қызмет атқарады.