Жаңалықтар

Ақтауда дәрігерді қылқындыра ұстаған ер адам оқиғаның мән-жайын айтты

02.11.2026

0 мин

0

74

Сурет: видеодан алынған кадр

Ақтаудағы облыстық балалар ауруханасында дәрігерге қол көтерген баланың әкесі әлеуметтік желіде видеоүндеу жариялады. Ол жанжалға дейін ұлының денсаулығына алаңдап, медициналық көмекке бірнеше рет жүгінгенін айтты, — деп хабарлайды Dauletten.kz  Lada.kz порталына сілтеме жасап.

Ақтауда дәрігерге шабуыл жасаған ер адам болған оқиғаға қатысты өз нұсқасын жариялады. Оның айтуынша, жанжалға дейін баласының денсаулығына байланысты ауруханаға бірнеше рет баруға мәжбүр болған. 

Ер адамның сөзінше, 19 қазанда ұлының жағдайы күрт нашарлаған. Баланың іші қатты ауырып, дене қызуы 39 градусқа дейін көтерілген. Жедел жәрдем қызметі оны аппендицитке күдікпен облыстық балалар ауруханасына жеткізген.

Әкесінің айтуынша, қабылдау бөлімінде ол баласын толық тексеруден өткізуді сұраған. Алғашқы қан талдауында лейкоцит деңгейі шамамен 21,5–22 болған. Соған қарамастан, кешкі уақытта баланы үйіне қайтарған.

Ер адам бұл шешіммен келіспей, сағат 23:00 шамасында қайтадан талдау тапсыруды талап еткен. Екінші зерттеу нәтижесінде де лейкоцит көрсеткіші жоғары болған. Осыдан кейін баланы дәрігерлердің бақылауында қалдырған.

Келесі күні басқа хирург баланы қарап, ота жасау туралы шешім қабылдаған. Әкесінің айтуынша, операция сәтті өткен.

Алайда 31 қазанда баланың іші қайта ауырып, әкесі оны тағы да облыстық балалар ауруханасына апарған. Сол жерде бұған дейін кездескен хирургпен қайта жолыққан.

Ер адамның мәлімдеуінше, дәрігер оны мысқылдап қарсы алып, баланы қараудан бас тартуы мүмкін екенін аңғартқан. Осы жағдайдан кейін екеуінің арасында сөзге келу туындап, арты төбелеске ұласқан.

Дәрігерге шабуыл жасалған сәт видеоға түсіп қалған

Бұған дейін Ақтаудағы облыстық балалар ауруханасының қабылдау бөлімінде ер адамның медицина қызметкеріне шабуыл жасағаны хабарланған еді.

Оқиға кезінде ол дәрігерді мойнынан қылқындырып ұстаған. Бейнежазбада ер адамның аяқпен үстелді теуіп, кенеттен медицина қызметкеріне тап бергені көрінеді. Оны бірнеше адам әрең дегенде дәрігерден ажыратқан.

Алдын ала жарияланған мәлімет бойынша, баланы ауруханаға жатқызуға медициналық көрсетілім болмаған.

Осылайша, жанжалға қатысты тараптардың мәлімдемелері әртүрлі. Әкесінің түсіндірмесі оқиғаның себебіне қатысты қосымша сұрақтар туындатқанымен, дәрігерге күш қолдануды ақтамайды.