Жаңалықтар

Әскерге шақырылатын жастардың назарына: биыл қандай мүмкіндіктер бар?

02.09.2026

мин

0

354

Сурет: Ақмешіт жастары

Қазақстанда күзгі әскерге шақыру науқаны басталды. Жыл соңына дейін 18-27 жас аралығындағы 23 мыңға жуық ер азамат мерзімді әскери қызметке жіберіледі, — деп хабарлайды Dauletten.kz.

Қазақстанда мерзімді әскери қызметке кезекті шақыру науқаны басталды. Президент Жарлығына сәйкес, қалалар мен аудандардағы шақыру комиссиялары жұмысын бастап, әскерге баруға тиіс азаматтарды іріктеу кезеңіне кірісті.

Жыл соңына дейін шамамен 23 мың жас әскери қызметке шақырылады. Олардың басым бөлігі Қарулы күштер мен Ұлттық ұлан қатарын толықтырады. Бұдан бөлек, жас сарбаздар ҰҚК Шекара қызметіне, Төтенше жағдайлар министрлігіне және Мемлекеттік күзет қызметіне жіберіледі.

Жоспар бойынша:

• 12 мыңнан астамы – Қарулы күштерге;
• 7 мыңы – Ұлттық ұланға;
• 3 мыңы – ҰҚК Шекара қызметіне;
• 400-ден астамы – Төтенше жағдайлар министрлігіне;
• 300-ге жуығы – Мемлекеттік күзет қызметіне қабылданады.

Әскерге шақырудың өзі де біртіндеп цифрлық форматқа көшіп жатыр. Әскери есепке қою, 17 жастағы азаматтарды тіркеу, сондай-ақ қызметті кейінге қалдыру немесе одан босату рәсімдерінің бір бөлігі «Цифрлық шақыру» және «Smart военкомат» жобалары арқылы автоматтандырылған.

Әскери есепке қатысты ақпаратты азаматтар eGov порталындағы жеке кабинеті арқылы тексере алады.

Бұл ретте әскери қызметтің тағы бір қырына назар аударуға болады. Қорғаныс министрлігінің мәліметінше, сарбаздар қызмет барысында тек әскери дайындықтан өтіп қана қоймай, кейін азаматтық өмірде қажет болуы мүмкін жұмысшы мамандықтарды да тегін меңгере алады.

Бағдарламада 20-ға жуық кәсіп қарастырылған. Олардың қатарында жүргізуші, байланыс маманы, парамедик және экскаваторшы сияқты мамандықтар бар.

Әскери қызметтің азаматтарға беретін мүмкіндігі мұнымен шектелмейді. Қызмет өткеру кезінде сарбаздардың несие төлемдерін кейінге қалдыруға мүмкіндігі бар.

Сонымен қатар әскери борышын өтеген азаматтар үшін жоғары білім алуға қатысты да жеңілдік қарастырылған. Олар ҰБТ тапсырмай-ақ мемлекеттік грантпен жоғары оқу орнына түсу мүмкіндігіне ие бола алады.

Осылайша, биылғы шақыру науқаны тек әскерге қабылдаумен шектелмейді: мерзімді қызмет кезінде мамандық меңгеру, қаржылық міндеттемелерді уақытша тоқтату және кейін жоғары білім алуға мүмкіндік беретін тетіктер де қарастырылған.