Жаңалықтар

Азия ойындары-2026: жүзуден Қазақстан құрамасы финалға шықты

21.09.2026

мин

0

92

Сурет: olympic.kz

Аичи-Нагояда өтіп жатқан XX жазғы Азия ойындарында жүзуден Қазақстан құрамасының өкілдері Ксения Игнатова мен Глеб Коваленя финалға жолдама алды. Спортшылар бүгін кешкі сессияда жүлделі орындар үшін бақ сынайды, — деп хабарлайды Dauletten.kz ҚР Туризм және спорт министрлігі Спортты дамыту дирекциясына сілтеме жасап.

Жүзуден іріктеу кезеңінің нәтижелері

Таңғы іріктеу сайыстарының қорытындысы бойынша қазақстандық жүзгіштер келесі көрсеткіштерді тіркеді:

 Ксения Игнатова әйелдер арасында 50 метрге шалқалай жүзуде 28,37 секунд нәтиже көрсетіп, 7-орынмен финалға өтті. Осы қашықтықта сынға түскен София Абубакирова 15-орынға тұрақтады.

 Глеб Коваленя ерлер арасында 50 метрге еркін әдіспен жүзуден 9-нәтиже көрсетіп, финалдық кезеңге өтті. Осы сайыста Әділбек Мусин 18-орын алды.

 Ерлер арасында 50 метрге шалқалай жүзуде Александр Румынский 21-орыннан көрінді.

Ксения Игнатова мен Глеб Коваленя қатысатын финалдық бәсекелер бүгін кеште өтеді.

21 қыркүйектегі жарыстар кестесі

Бүгін Қазақстан құрамасының өкілдері Азия ойындарында жекелей және командалық спорт түрлерінен бақ сынайды. ҚР Туризм және спорт министрлігі жариялаған кестеге сәйкес:

 05:00-ден бастап: Академиялық есу, жағажай волейболы және шөптегі хоккей (Қазақстан әйелдер құрамасы Оңтүстік Кореяға қарсы) жарыстары басталды.

 05:30-дан бастап: Бадминтон, триатлон, оқ және стендтік ату, каратэ, волейбол, ММА, үстел теннисі, жүзу және спорттық гимнастика өкілдері бәсекеге түсуде.

 08:00 және 13:00: Боксшылар рингке шығады.

 09:15 және 10:30: 3×3 баскетболдан ерлер құрамасы Шри-Ланка мен Моңғолия командаларымен кездеседі.

 12:05: Су добынан әйелдер құрамасы Жапонияға қарсы ойын өткізеді.

Түстен кейін жүзуден өтетін шешуші финалдармен бірге каратэ және ушу шеберлерінің белдесулері жоспарланған.

Еске сала кетейік, XX жазғы Азия ойындары 4 қазанға дейін жалғасады. Қазақстан құрамасы сапында 558 спортшы 35 спорт түрінен өнер көрсетуде.