Жаңалықтар

Инфляциядан 4 есе жоғары: Қазақстанда фармацевтикалық өнімдер неге қымбаттап жатыр?

21.09.2026

мин

0

109

Сурет: sn.kz

Қазақстанда фармацевтикалық өнімдердің бағасы рекордтық қарқынмен өсіп жатыр. Статистика мәліметтеріне сүйенсек, дәрі-дәрмек нарқының қымбаттауы жалпы елдегі инфляция деңгейінен 4 есе асып түскен. Осы орайда мемлекет бағаны реттеу саясатын өзгертіп, еркін нарықтық механизмдерге өтуді көздеп отыр, — деп хаьарлайды Dauletten.kz.

Ұлттық статистика бюросы мен Energyprom.kz аналитиктерінің деректері елдегі дәрі-дәрмек бағасының күрт өскенін айқын көрсетеді:

 Айлық динамика: 2026 жылғы тамызда фармацевтикалық өнімдер бағасы бір айда 2,3%-ға қымбаттады. Бұл ретте жалпы инфляция 0,6%-ды құрап, дәрілердің қымбаттау қарқыны жалпы көрсеткіштен шамамен 4 есе асып кетті.

 Жыл басынан бері: Қаңтардан бері фармөнімдер 13,8%-ға өсті (басқа тауарлар мен қызметтердің орташа өсімі – 6,4%).

 Жылдық көрсеткіш: Дәрілердің жылдық қымбаттауы 21,6%-ға жетіп, жалпы инфляциядан (9,8%) екі еседен астам жоғары болды.

Мемлекеттік реттеу қысқарады: Нарық бағаны тұрақтандыра ала ма?

Бағаның осындай қарқынды өсімі жағдайында Денсаулық сақтау министрлігі 2022 жылы басталған дәрі-дәрмек бағасын мемлекеттік реттеуді кезең-кезеңімен алып тастау саясатын жалғастыруда.

Осы шешім аясында бағасы реттелетін дәрілер тізімінен 1,2 мыңнан астам позиция шығарылып, олардың саны 3 039-дан 1 827-ге дейін азайды. Енді бағасы 1 ең төменгі есептік көрсеткіштен (4 325 теңгеден) төмен арзан рецептілік дәрілердің нарқы сұраныс пен ұсынысқа қарай қалыптасады.

Сарапшылардың болжамы

Денсаулық сақтау министрлігі мен Фармацевтикалық қызметті қолдау және дамыту қауымдастығының өкілдері еркін баға белгілеуге көшу жағдайды оңтайландырады деп есептейді. Сарапшылардың пікірінше:

1. Бәсекелестік артады: Арзан дәрілер сегментінде мемлекеттік шектеудің болмауы нарыққа жаңа жеткізушілерді тартады.

2. Ассортимент кеңейеді: Еркін баға белгілеу елге әкелінетін өнім көлемін көбейтіп, отандық фармацевтика өнеркәсібінің дамуына серпін береді.

3. Баға тұрақталады: Бәсекелестіктің күшеюі арзан препараттардың бағасын одан әрі төмендетуге ықпал етуі тиіс.

Азаматтар бағаны қалай бақылай алады?

Мемлекеттік тізімде қалған, шекті бағасы бекітілген дәрілердің заңсыз қымбаттауын байқаған тұтынушылар өз құқықтарын қорғай алады. Заңбұзушылық туралы Денсаулық сақтау министрлігінің Медициналық және фармацевтикалық бақылау комитетіне DariKZ қосымшасы арқылы арыздануға болады. Шағымға кассалық түбіртек пен дәрі қаптамасының фотосуретін тіркеу қажет.