Жаңалықтар

Отбасы банк «Ұмай» әйелдер ипотекасының екінші кезеңін ерте бастауды жоспарлап отыр

15.09.2026

мин

0

232

Сурет: kursiv.kz

Қазақстанда әйелдерге арналған «Ұмай» ипотекалық бағдарламасына алғашқы кезеңнің өзінде сұраныс жоғары болды. Банкке түскен өтінім саны қаржыландырудың келесі бөлігін жоспардан ертерек тарту мәселесін көтеруге себеп болған, — деп хабарлайды Dauletten.kz.

«Ұмай» бағдарламасы іске қосылғаннан кейін баспана алуға ниетті әйелдерден жүздеген өтінім түскен. Отбасы банкінің мәліметінше, 31 тамыздан бері 855 өтінім қабылданған.

Банк олардың барлығына алдын ала мақұлдау берген. Бұл енді қатысушылардың баспана іздеп, талапқа сай тұрғын үйді таңдағаннан кейін ипотеканы рәсімдеу кезеңіне өте алатынын білдіреді.

Өтінімдерге қарағанда, бағдарлама қатысушылары сұрап отырған несие көлемі де аз емес. Бір өтінімге шаққандағы орташа қарыз сомасы 23,4 млн теңгені құраған.

Бағдарламаға қызығушылық танытқан әйелдердің жасы да әртүрлі. Ең жас қатысушы – 18 жаста болса, ең үлкені – 63 жаста. Қатысушылардың орташа жасы 39 жас болған.

«Ұмайдың» алғашқы траншын Азия даму банкі қаржыландырған. Бұл кезеңге 9 млрд теңге бөлінген.

Алайда алғашқы кезеңдегі сұраныс банк күткеннен жоғары болғанға ұқсайды. Осыған байланысты Отбасы банкі Азия даму банкіне қаржыландырудың екінші траншын мерзімінен бұрын бөлу туралы өтініш жолдаған.

Екінші транштың нақты қашан бөлінетіні және жаңа өтінім қабылдау кезеңінің мерзімі әзірге айтылған жоқ. Банк бұл туралы кейінірек қосымша ақпарат беретінін хабарлады.

Жалпы «Ұмай» бағдарламасын қаржыландыруға 90 млрд теңге қарастырылған. Алғашқы кезеңнің нәтижесі әйелдердің тұрғын үйге арналған жеңілдетілген қаржыландыруға сұранысы жоғары екенін көрсетіп отыр.

Айта кетейік, брифинг кезінде бағдарламаға қатысу талаптарын өзгерту немесе күшейту туралы нақты шешім айтылған жоқ.