Жаңалықтар

Балалар лагерлері енді жаңа ережемен жұмыс істейді

14.07.2026

мин

0

88

Сурет: zakon.kz

Қазақстанда балаларды қабылдайтын сауықтыру орталықтарына қойылатын талап күшейтілді. Енді лагерьлер бірыңғай лицензиялық талаптарға сай болуы тиіс. Бұл бастама балалардың қауіпсіздігін арттырып, көрсетілетін қызмет сапасын бақылауды көздейді, — деп хабарлайды Dauletten.kz.

Оқу-ағарту министрлігі балалардың жазғы демалысын қауіпсіз әрі сапалы ұйымдастыру бағытындағы жұмыстарды жалғастырып жатыр. Биыл жазғы сауықтыру және демалыс бағдарламаларымен 3 миллионнан астам баланы қамту жоспарланған. Оның шамамен 600 мыңы – әлеуметтік осал санаттағы балалар.

Жазғы демалыс кезінде балалар тек тынығып қана қоймай, тәрбиелік және білім беру бағдарламаларына да қатысады. Олар «Адал азамат», «Заң және тәртіп» бастамалары, сондай-ақ Мемлекет басшысының «Таза Қазақстан» экологиялық жобасы аясындағы «Жасыл сабақтар» арқылы жүзеге асырылады.

Министрлік биыл балалардың қауіпсіздігіне ерекше басымдық беріп отыр. Осыған байланысты жыл бойы және маусымдық жұмыс істейтін білім беру-сауықтыру орталықтарына бірыңғай лицензиялық талап енгізілді.

Лицензия алу үшін лагерьлер санитариялық-эпидемиологиялық талаптарды, өрт және терроризмге қарсы қауіпсіздік нормаларын сақтап, бейнебақылау мен басқа да қауіпсіздік жүйелерімен жабдықталуы тиіс. Сонымен қатар материалдық-техникалық базасы белгіленген стандарттарға сай болып, бекітілген білім беру бағдарламалары және білікті педагогтар мен медицина қызметкерлері болуы қажет.

Қазіргі уақытта еліміз бойынша 45 білім беру-сауықтыру орталығы лицензия алған. Тағы 60-тан астам өтінім қаралу үстінде.

Жаңа тетік балалар лагерлерінің жұмысын бірыңғай стандартқа келтіруге, қызмет сапасын арттыруға және ең бастысы – балалардың қауіпсіздігін қамтамасыз етуге бағытталған.