|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
2025 жылдың тоғыз айында Қазақстан экономикасы 6,3%-ға ұлғайды. Еңбек өнімділігі де 5,6%-ға артып, соңғы 13 жылдағы ең жоғары көрсеткіштердің бірін көрсетті. Алайда осы өсім халық табысына толық әсер етпей отыр. Яғни жалақы динамикасы баяулаған, - деп хабарлайды Dauletten.kz.
2025 жылдың қаңтар–қыркүйек айларында елдегі еңбек өнімділігі нақты мәнде 5,6%-ға артты. Бұл – кейінгі он үш жыл ішіндегі ең жоғары нәтижелердің бірі. Жалпы ішкі өнімнің өсімі бұдан да жоғары болып, 6,3%-ды құрады.
Halyk Finance сарапшысы Арслан Аронов мәліметінше, өсімге бірқатар базалық салалар серпін берген. Өңдеу өнеркәсібі 5,7%-ға, құрылыс 16,8%-ға, ал көлік саласы 20,2%-ға кеңейген. Сонымен қатар мұнай өндірісінің артуы мен бюджеттік ынталандыру шаралары да экономикалық белсенділікті күшейткен.
Алайда негізгі мәселе — өнімділік артқанымен, жалақы өсімінің баяулауы.
Сарапшылардың айтуынша, 2023 жылдан бері еңбек өнімділігі мен еңбекақы арасындағы дәстүрлі байланыс әлсірей бастаған. 2025 жылы бұл айырмашылық айқын көрінді: өндіріс көлемі ұлғайғанымен, бизнес тиімділігі сол қарқынмен өспеуі мүмкін. Нәтижесінде қосылған құнның бір бөлігі еңбек нарығына емес, шығындарды жабуға немесе инвестицияға бағытталуы ықтимал.
Бұл жағдай экономиканың «сандық өсім» кезеңіне өткенін аңғартады. Яғни өндіріс көлемі артып жатыр, бірақ сапалы құрылымдық өзгерістер мен табыс өсімінің таралуы біркелкі емес.
Сарапшылар болжамынша, 2026 жылы экономикалық өсім қарқыны баяулауы мүмкін. Мұндай жағдайда еңбек өнімділігі де, жалақы динамикасы да төмен қарқынға түсуі ықтимал. Экономиканың тұрақты дамуы үшін өнімділік өсімі мен халық табысы арасындағы теңгерімді қалпына келтіру маңызды болмақ.
