Жаңалықтар

Гонконг тұмауы: Қазақстандағы жағдай қандай?

24.11.2025

мин

0

1078

Қазақстанда «Гонконг тұмауы» деп аталып жүрген вирус жаңа инфекция емес. ҚР Денсаулық сақтау бірінші вице-министрі Тимур Сұлтанғазиевтің айтуынша, бұл — бұрыннан белгілі А типті тұмау (H3N2). Вирус алғаш рет 1968 жылы анықталған және жыл сайынғы маусымдық айналымда қалып отыр, - деп хабарлайды Dauletten.kz.

Эпидемиологиялық маусым басталғалы елде 1,5 миллион ЖРВИ жағдайы тіркелген, бұл өткен маусымнан 20% төмен. Тұмаудың зертханалық расталған 590 жағдайының 587-сі — А типі, ал жаңа штамм тіркелмеген. Сарапшылардың дерегі бойынша, биыл вирустың белсенділігі қазан айының алғашқы жартысында байқалған.

Сұлтанғазиев қазіргі айналымдағы вирустар тұмауға қарсы маусымдық вакцинаның штаммдарымен толық сәйкес келетінін айтады. Сондықтан да екпе салдыру аурудың ауыр өтуінің алдын алуға көмектеседі.

ЖРВИ белгілерін бағалауда әсіресе балаларға назар аудару қажет. Денсаулық сақтау министрлігінің штаттан тыс бас балалар инфекционисі Динагүл Баешеваның айтуынша, 5 жасқа дейінгі балаларда төмендегі симптомдар байқалса, дәрігерге дереу жүгінген дұрыс:
    •    бала тамақ не су ішуден бас тартса;
    •    жағдайы күрт нашарлап, әлсізденсе;
    •    дене қызуы дәріден кейін де түспесе;
    •    демігу, қалтырау, мазасыздық пайда болса;
    •    тоқтаусыз жыласа немесе керісінше үнемі маужырап жүрсе.

Маман мұндай белгілер аурудың ауыр өтетінін көрсететінін атап өтеді.

Баешеваның айтуынша, асқынған ЖРВИ кезінде бронхиолит, бронхит, пневмония сияқты тыныс жолдарының аурулары жиі кездеседі. Сондай-ақ құлақ пен мұрын қуыстарының қабынуы болуы мүмкін. Ал тұмаудың ауыр түрінде ми, жүрек, өкпе және бүйрек қызметіне әсер ететін асқынулар байқалуы ықтимал.

Мамандар тұмау маусымдық болғанымен, оны елемеуге болмайтынын және белгілерді дер кезінде бақылаудың маңызды екенін ескертеді.

Ресми деректерге сүйенсек, «Гонконг тұмауы» — бұрыннан белгілі А типті H3N2 вирусы, Қазақстанда оның жаңа мутациясы анықталмаған. Ал ЖРВИ мен тұмаудың ауыр белгілері байқалған жағдайда, әсіресе балаларда, медициналық көмекке жедел жүгіну қажет. Сарапшылар вакцинацияның маусымдық тұмаудың ауыр өтуін азайтатын ең тиімді құрал екенін қайта еске салады.