Жаңалықтар

Көлсайда ұзындығы 6 шақырымнан асатын аспалы жол салынбақ

02.06.2026

мин

0

98

Сурет: Егемен Қазақстан

Алматы облысындағы көрікті Көлсай көлдерінде жаңа туристік жоба жүзеге асады. Жалпы құны 15 миллиард теңгені құрайтын аспалы жол Төменгі және Орта Көлсай көлдерін байланыстырып, өңірдің туристік тартымдылығын арттыруға бағытталған, — деп хабарлайды Dauletten.kz.

Көлсай көлдерінде ұзындығы 6 шақырымнан асатын аспалы жол салу жоспарланып отыр. Жоба құрылысы 2026 жылы басталып, 2028 жылдың басында пайдалануға беріледі деп күтілуде.

Жоба жетекшілерінің айтуынша, құрылыс жұмыстары табиғи экожүйеге зиян келтірмейтін заманауи технологиялар арқылы жүргізіледі. Осыған байланысты құрылыс кезінде ағаштарды кесу қарастырылмаған.

Аспалы жолдың бағыты Көлсай аумағында салынып жатқан 500-ден астам көлікке арналған автотұрақтан басталады. Мамандардың мәліметінше, екінші көлге дейін автомобиль жолын салу жоспарда жоқ.

«Көлсай көлдері» ұлттық паркінің дерегіне сәйкес, өткен жылы табиғи аймаққа 600 мыңнан астам адам келген. Оның ішінде 128 мың турист шетелден келген қонақтар болған. Жаңа инфрақұрылымдық жоба келушілерге қолайлы жағдай жасап қана қоймай, өңірдің туристік әлеуетін одан әрі дамытуға мүмкіндік береді.