Жаңалықтар

Көпбалалы отбасылар мен наградталған аналарға қанша жәрдемақы төленді

24.11.2025

мин

2

1774

2025 жылдың басынан бастап көпбалалы отбасыларға және наградталған аналарға берілетін мемлекеттік жәрдемақымен орта есеппен 846,5 мың отбасы қамтылды, - деп хабарлайды Dauletten.kz.

Олар жалпы сомасы 501,8 млрд теңге мөлшерінде жәрдемақы алды. Оның ішінде көпбалалы отбасыларға берілетін жәрдемақымен – 603 мың отбасы 436,5 млрд теңгеге, наградталған анаға берілетін жәрдемақымен – 243,4 мың адам 65,2 млрд теңгеге қамтылды. Бұл туралы Еңбек және халықты әлеуметтік қорғау министрлігі айтты.

Қазан айында аталған жәрдемақыларды жалпы 835,2 мың отбасы алды. Төлемдердің жиынтық көлемі 52 млрд теңгені құрады. Оның ішінде:
– көпбалалы отбасыларға берілетін жәрдемақымен 590 мың отбасы 45,4 млрд теңгеге қамтылды;
– наградталған аналарға төленетін жәрдемақымен 245,1 мың адам 6,6 млрд теңге мөлшерінде қамтамасыз етілді.

Көпбалалы отбасыларға арналған мемлекеттік жәрдемақыны бірге тұратын 4 және одан да көп кәмелетке толмаған балалары немесе 23 жасқа дейінгі күндізгі бөлімде оқитын студент балалары бар отбасылар табысына қарамастан ала алады.

Төлем көлемі бала санына қарай белгіленеді. 2025 жылы оның мөлшері төмендегідей болды:

• 4 балаға – 16,03 АЕК немесе 63 030 теңге;

• 5 балаға – 20,04 АЕК немесе 78 798 теңге;

• 6 балаға – 24,05 АЕК немесе 94 565 теңге;

• 7 балаға – 28,06 АЕК немесе 110 332 теңге;

• 8 және одан да көп бала тәрбиелеп отырған отбасыларға – әр балаға 4 АЕК немесе 15 728 теңге көлемінде төленді.

Наградталған анаға берілетін жәрдемақы «Алтын алқа», «Күміс алқа» иегерлеріне, сондай-ақ бұрын «Батыр ана» атағын алған және І, ІІ дәрежелі «Ана даңқы» ордендерімен марапатталған аналарға тағайындалады.

Мұндай жәрдемақының ай сайынғы мөлшері:
– «Күміс алқа» иелеріне – 6,40 АЕК немесе 25 165 теңге;
– «Алтын алқа», «Батыр ана» атағы бар және «Ана даңқы» ордендерінің І, ІІ дәрежелерімен марапатталған аналарға – 7,40 АЕК немесе 29 097 теңге.