Жаңалықтар

Нөсер мен дауыл: еліміздің қай өңірінде ауа райы нашарлайды

06.05.2025

1 мин

0

1343

Сурет: istockphoto.com

Синоптиктердің болжауынша, алдағы күндері Қазақстанның бірнеше өңірінде ауа райы құбылмалы болады. Кей аймақтарда нөсер жауып, қатты жел соқса, басқа өңірлерде өрт қаупі жоғары болып қала береді, - деп хабарлайды Dauletten.kz.

Қарағанды облысында оңтүстік-батыстан соққан жел оңтүстік-шығысқа ауысады. Күндіз облыстың оңтүстігінде желдің екпіні 15 м/с-қа жетеді. Батыс, оңтүстік және шығыс бөліктерінде өрт қаупі жоғары, ал солтүстігінде өрт қаупі артады. Қарағанды қаласында да жоғары өрт қаупі сақталады.

Ұлытау облысының шығыс, оңтүстік және орталық аудандарында өрт қаупі жоғары. Жезқазған қаласында да осындай жағдай байқалады.

Батыс Қазақстан облысында оңтүстік және шығыс аудандарда қатты жаңбыр жауады. Батыс, оңтүстік және шығыс өңірлерде найзағай, бұршақ болуы ықтимал. Жел бағытын оңтүстік-шығыстан солтүстік-шығысқа ауыстырып, күндіз екпіні 15-20 м/с-қа дейін күшейеді. Облыстың орталық бөлігінде өрт қаупі жоғары болады.

Атырау облысында солтүстікте нөсер мен бұршақ жауып, түнде найзағай, ал күндіз оңтүстік, солтүстік және шығыс аймақтарда найзағай болжанады. Шығыс және солтүстік-шығыстан соғатын желдің түнгі екпіні 15-20 м/с. Оңтүстікте өрт қаупі жоғары. Атырау қаласында найзағай болжануда.

Маңғыстау облысының батыс, солтүстік және орталық аудандарында найзағай, ал батысында тұман күтіледі. Жел оңтүстік-батыстан солтүстік-батысқа ауысады. Солтүстік-шығыста күндіз жел екпіні 15-20 м/с дейін жетеді. Өңірдің көп бөлігінде өрт қаупі жоғары. Ақтауда таңертең және күндіз найзағай мен тұман болжанады.

Ақтөбе облысының батысында найзағай күтіледі. Оңтүстік пен оңтүстік-шығыстан соғатын желдің екпіні күндіз батыс пен солтүстікте 15-20 м/с-қа жетеді. Оңтүстік пен оңтүстік-шығыста өрт қаупі жоғары. Ақтөбе қаласында жел 15-18 м/с жылдамдықпен соғады.

Қызылорда облысының орталық және шығыс бөліктерінде шаңды дауыл тұрады. Жел шығыс және солтүстік-шығыстан соғып, екпіні 15-20 м/с. Өңірдің барлығында өрт қаупі жоғары, ал кей жерлерде төтенше өрт қаупі бар. Қызылорда қаласында күндіз шаңды дауыл күтіледі.

Солтүстік Қазақстан облысында түнде солтүстікте, күндіз батыс және оңтүстікте найзағай болады. Жел оңтүстік-батыстан соғып, кей жерлерде 15-20 м/с-қа дейін күшейеді. Петропавлда да дәл осындай жел күтіледі.

Жетісу облысында солтүстік-шығыстан соғатын желдің екпіні шығыс, орталық және таулы аймақтарда 23-28 м/с дейін барады. 6-8 мамыр аралығында батыс, солтүстік және оңтүстік-шығыста өрт қаупі жоғары. Талдықорғанда желдің екпіні 15-20 м/с.

Жамбыл облысында (Таразда) жел солтүстік-шығыстан соғып, күндіз екпіні 15-20 м/с жетеді. Өрт қаупі жоғары.

Абай облысында жел солтүстік-батыстан соғып, солтүстік, шығыс және орталық аймақтарда екпіні 15-20 м/с. Облыстың солтүстік-батыс, оңтүстік және орталық бөліктерінде өрт қаупі жоғары. Семейде де дәл осындай жағдай.

Шығыс Қазақстан облысында да солтүстік-батыс желі соғып, күндіз кей аймақтарда 15-20 м/с-қа дейін күшейеді. Солтүстік-батыс және оңтүстікте өрт қаупі жоғары. Өскеменде де өрт қаупі бар.

Павлодар облысының оңтүстік және шығыс аудандарында өрт қаупі жоғары. Павлодар қаласында да өрт қаупі күтіледі.

Астанада өрт қаупі жоғары.

Ақмола облысының батысы мен солтүстігінде найзағай болады. Жел оңтүстік-батыстан соғып, екпіні 15-20 м/с дейін барады. Батыс пен оңтүстікте өрт қаупі жоғары.

Алматы облысының солтүстік және орталық бөліктерінде, сондай-ақ Қонаев қаласында өрт қаупі жоғары.