Жаңалықтар

Қарағанды облысында қатты жел тұрғын үйлердің шатырын ұшырып кетті

27.04.2026

мин

0

85

Сурет: zakon.kz

Аймақта соққан қатты жел салдарынан бірнеше тұрғын үй мен әлеуметтік нысандарға зақым келді. Абырой болғанда, зардап шеккендер жоқ, — деп хабарлайды Dauletten.kz.

Қарағанды облысында ауа райының күрт нашарлауынан қатты жел тұрып, бірқатар нысандарға зиян келтірді. Тұрғын үйлердің шатырлары бүлініп, кей жерлерде ағаштар құлаған. Сондай-ақ пайдаланылмай тұрған металл мұржа да желге шыдамай құлап түскен.

Синоптиктердің дерегінше, желдің жылдамдығы секундына 23 метрге дейін жеткен. Облыс орталығы Қарағанды қаласында үш тұрғын үйдің шатыры ішінара зақымданған. Сонымен қатар, аулалардың бірінде тұрған жеңіл автокөлікке де залал келген.

Абай қаласында бес қабатты екі тұрғын үйдің шатырына зақым келсе, Осакаров ауданында мектеп ғимаратының шатыры бүлінген. Қарқаралы қаласында да екі қабатты тұрғын үйдің шатырына зиян келгені белгілі болды. Бұдан бөлек, №2 қазандық аумағында орналасқан пайдаланылмай тұрған металл мұржа құлаған.

Төтенше жағдайлар қызметінің мәліметінше, қолайсыз ауа райына қарамастан, адам шығыны мен зардап шеккендер тіркелмеген.