Жаңалықтар

Қазақстан мен Түркия президенттері Қожа Ахмет Ясауи атындағы мектептің ашылуына қатысты

14.05.2026

мин

0

86

Қазақстан және Түркия президенттері Қожа Ахмет Ясауи атындағы мектептің ашылу рәсіміне бейнебайланыс арқылы қатысты, — деп хабарлайды Dauletten.kz.

Қасым-Жомарт Тоқаев пен Режеп Тайип Ердоған Түркияның Газиантеп провинциясындағы Нурдагы қаласында салынған жаңа мектептің ашылу салтанатына онлайн форматта қатысты.

Қожа Ахмет Ясауи есімі берілген білім ордасында бастауышқа арналған 32 сынып және мектепке дейінгі дайындыққа арналған 4 сынып бар. Ғимараттың жалпы аумағы 6 мың шаршы метрді құрайды.

Мектеп заманауи талаптарға сай жабдықталған. Онда арнайы оқу кабинеттері, зертханалар, кітапхана және мәжіліс залы қарастырылған. Құрылыс кезінде қауіпсіздік талаптары мен қазіргі құрылыс нормалары толық ескерілген.

Айта кетейік, бұл жоба 2023 жылғы жойқын жер сілкінісінен зардап шеккен өңірді қолдау мақсатында жүзеге асырылды. Жаңа мектеп салу бастамасын Қазақстан Президенті көтерген болатын.