Жаңалықтар

Қазақстанда адамның жеке басын бірнеше секундта анықтайтын жүйе енгізілмек

02.07.2026

мин

0

118

Сурет: OKG.kz

Қазақстанда саусақ ізі мен ДНҚ деректерін біріктіретін жаңа биометриялық жүйе енгізу жоспарланып отыр, — деп хабарлайды Dauletten.kz.

Қазақстанда адамның жеке басын анықтау жүйесін жаңғырту көзделіп отыр. Ішкі істер министрлігі биометриялық тіркеу қағидаларына өзгерістер енгізуді ұсынып, тиісті жобаны қоғамдық талқылауға шығарды.

Жобаға сәйкес, саусақ ізі мен ДНҚ туралы мәліметтер «Биометриялық тұлғаны сәйкестендіру» атты бірыңғай ақпараттық жүйеге біріктіріледі. Соның арқасында құқық қорғау органдары адамның жеке басын бірнеше секунд ішінде анықтай алады.

Жаңа жүйеде Қазақстан азаматтарының саусақ іздерінің бірыңғай базасы қалыптастырылады. Бұл базаға жеке куәлік немесе паспортты рәсімдеу және ауыстыру кезінде тапсырылатын саусақ іздері енгізіледі.

Ал ДНҚ деректері барлық азаматтан жиналмайды. Министрліктің түсіндіруінше, мұндай база тек қылмыстық істерді тергеу мақсатында пайдаланылады. Оған жазасын өтеп жатқан сотталғандардың, сондай-ақ жеке басы анықталмаған және із-түзсіз жоғалған адамдардың биологиялық үлгілері енгізіледі.

Министрлік бұл өзгерістер қағаз құжат айналымын азайтып, барлық мәліметті цифрлық форматқа көшіруге мүмкіндік беретінін айтады. Сонымен қатар криминалистер оқиға орнынан алынған айғақтарды жылдам тексеріп, саусақ ізі мен ДНҚ деректерін бір адамның цифрлық профилі арқылы салыстыра алады.

Бұдан бөлек, бірыңғай электронды база тергеу изоляторларында, түзеу мекемелерінде және пробация есебінде тұрған адамдарды есепке алу мен бақылау жұмыстарын да жеңілдетеді.