Жаңалықтар

Еңбек министрлігі инспекторлардың өкілеттігін арттыруды көздейді

13.04.2026

мин

0

79

Сурет: Егемен Қазақстан

Қазақстанда еңбек құқықтарын қорғау күшейтіліп жатыр. Жыл басынан бері мыңдаған жұмысшының мәселесі шешіліп, жүздеген миллион теңге жалақы қарызы қайтарылған, — деп хабарлайды Dauletten.kz ҚР Еңбек және халықты әлеуметтік қорғау министрлігіне сілтеме жасап. 

ҚР Еңбек және халықты әлеуметтік қорғау министрлігі еңбек саласындағы бақылау жүйесін жаңартуға кірісті. Негізгі мақсат – жұмысшылардың құқықтарын тиімді қорғап, заңбұзушылықтардың алдын алу.

Ресми дерекке сәйкес, биылғы жылдың алғашқы үш айында мемлекеттік инспекторлар 17,5 мың қызметкердің құқықтарын қорғап, жұмыс берушілерден 452 миллион теңгеден астам жалақы берешегін өндіріп алған.

Жаңа өзгерістер аясында қоғамдық бақылау күшейтілмек. Парламент қарауына ұсынылған түзетулер қабылданса, техникалық инспекторлардың өкілеттігі кеңейеді. Олар енді ақпаратты өз бетінше сұратып, кәсіпорындарда тексеру жүргізіп, тексеріс процестеріне белсенді қатыса алады.

Сонымен қатар өндірістегі қауіпсіздікті арттыруға ерекше көңіл бөлінуде. Кәсіпорындарда арнайы өндірістік кеңестер құрылып, олар жұмыс берушілер, қызметкерлер және кәсіподақ өкілдерінің тең қатысуымен жұмыс істейді. Бұл құрылымдар ықтимал тәуекелдерді алдын ала анықтауға мүмкіндік береді.

Министрлік өндірістік жарақаттарды жасыру жағдайларын болдырмау үшін құқық қорғау органдарымен бірлесіп жаңа бақылау тетіктерін енгізуде. Соның арқасында әрбір жазатайым оқиға толық бақылауда болады.

Бұдан бөлек, цифрлық бақылау құралдары да күшейтіледі. «Еңбек тәуекелдерінің картасы» басқа мемлекеттік жүйелермен біріктіріліп, проблемалы кәсіпорындарды нақты уақыт режимінде бақылауға мүмкіндік береді.

Жаңа бастамалар еңбек нарығындағы ашықтықты арттырып, жұмысшылардың құқықтарын қорғауды жаңа деңгейге көтеруге бағытталған.