Жаңалықтар

Мәжілісте рақымшылық мәселесі көтерілді: қандай жаза кешіріледі?

21.05.2026

мин

0

97

Сурет: ortcom.kz

Қазақстанда қылмыстық және әкімшілік құқық бұзушылықтардың кейбір түрлеріне қатысты рақымшылық жасау ұсынылды, — деп хабарлайды Dauletten.kz.

Мәжілісте таныстырылған жаңа заң жобасы жауапкершілікті жеңілдетіп, айыппұлдар мен жаза мерзімдерін қайта қарауды көздейді.

Парламент депутаттары рақымшылық жасауға қатысты жаңа заңнамалық түзетулерді ұсынды. Бастама қылмыстық және әкімшілік құқық бұзушылықтардың бір бөлігін ізгілендіруге бағытталған.

Мәжіліс депутаты Снежанна Имашева мәлім еткендей, заң жобасында ауырлығы жеңіл және орташа қылмыстар бойынша жауапкершіліктен босату қарастырылған. 

- Заң жобаларымен қылмыстық рақымшылық аясында зиян келтіруге әкеп соқпаған немесе келтірілген зиян толық өтелген жағдайда ауырлығы аз және орташа қылмыстық теріс қылықтар мен қылмыстар бойынша жауаптылықтан босату ұсынылады. Сонымен қатар ауыр және аса ауыр қылмыстар бойынша зиян толық өтелсе, жаза мерзімдерін қысқарту көзделген, – деді депутат.

Сонымен қатар ауыр және аса ауыр қылмыстарға қатысты да бірқатар өзгеріс ұсынылып отыр. Егер келтірілген зиян толық өтелсе, сотталған азаматтардың жаза мерзімін қысқарту тетігі қарастырылған.

Әкімшілік құқық бұзушылықтар бойынша да рақымшылық енгізу жоспарлануда. Ұсыныс аясында заң күшіне енгенге дейін төленбей қалған әкімшілік айыппұлдарды есептен шығару мүмкіндігі қарастырылған. Бұл норма жеке тұлғаларға, кәсіпкерлерге, нотариустарға, адвокаттарға, қандас мәртебесі бар азаматтарға және өзге де санаттарға қатысты болуы мүмкін.

Депутаттардың айтуынша, бастама қоғам қауіпсіздігіне айтарлықтай қатер төндірмейтін құқық бұзушылықтарға қатысты гуманистік тәсілді күшейтуге бағытталған. Заң жобасы алдағы уақытта Парламент қарауына шығарылады.