Жаңалықтар

«Саламатты Қазақстан» медициналық пойызы Шығыс Қазақстан және Абай облыстарын аралайды

23.05.2023

1 мин

0

306

Бүгіннен бастап 12 маусымға дейін «Саламатты Қазақстан» медициналық пойызы Шығыс Қазақстан мен Абай облысының 11 шалғай стансасын аралап өтеді, деп хабарлайды Dauletten.kz ҚазАқпарат-қа сілтеме жасап.

Дәрігерлер алғашқы медициналық-санитарлық көмек көрсетіп, кеңес берулер мен тексерулер жүргізеді. Қажет болған жағдайда шағын операциялар жасалып, кейбір нақты бағыттағы мамандары мен емханалары жоқ алыс ауыл тұрғындарына жоспарлы емдеуге жатқызуға жолдама береді. Науқастарды қабылдау сағат 9:00-ден 18:00-ге дейін қабылданады. Түскі асқа үзіліс сағат 13:00-ден 14.00-ге дейін болады.

Медициналық пойыз бүгін таңертеңгі 07:16-да Жарма стансасына аялдады. Алдағы уақытта Ертіс зауыты, Тишинская, Ермаковка, Таусамалы, 31 мамыр Алтай, Күмістау, Шар, Суықбұлақ, Белағаш және Дегелең бекеттерінде болады.

Пойыз бағдары медициналық кабинеттері жоқ өңірлерді қамтиды. Демек, биыл шалғай стансалардың тұрғындары тегін тексеруден өтіп, терапевт, стоматолог, офтальмолог, лор, хирург, уролог, маммолог, педиатр сынды біліктілігі жоғары мамандардан ем алады. Пойыз заманауи диагностикалық және емдеу жабдықтарымен, УДЗ-мен, флюорографиялық аппаратпен, шағын ота зертханасымен, интернетке сымсыз қосылуға мүмкіндік беретін байланыс құралымен жабдықталған.

Әйелдер істері және отбасылық-демографиялық саясат жөніндегі ұлттық комиссияның бастамасымен пойыз жұмысына алғаш рет азаматтарға тиімді психологиялық, құқықтық және медиативтік (татуластыру) көмек көрсететін кәсіби психолог, медиатор және заңгер тартылған. Бұдан басқа, азаматтардың мемлекеттік әлеуметтік қолдау алу құқықтарын қорғау, зейнетақылар, жәрдемақылар, әлеуметтік төлемдер және атаулы әлеуметтік көмек алу мәселелері бойынша тегін кеңестер қарастырылған.

Жалпы, консультативтік-диагностикалық пойыздың дәрігерлері 3695 тұрғынды, оның ішінде 1648 баланы қабылдады. Дәрігерлік қараулардың жалпы саны - 10628. 86 шағын хирургиялық операция жасалды.

Пойыздың әр маманы көптеген науқасты тексерді: жалпы тәжірибе дәрігері, терапевт, педиатр - 594 адам; хирург – 1 629; уролог – 1 112; невропатолог – 943; офтальмолог – 1 878; ЛОР – 1 398; акушер-гинеколог – 270; стоматолог – 1 142; ЭКГ - 713; УДЗ - 742; ФЛГ – 74 және психолог - 47 адам.

Әлеуметтік жобалар қорының мәліметі бойынша, пойызда зерттеуге қажетті барлық жабдық бар. Медициналық пойыз бүкіл Қазақстанды аралап, шалғай аудандардағы 121 стансаны қамтиды.