Жаңалықтар

Шетел азаматтары Қазақстанға кіру үшін ақы төлейтін болды

26.06.2026

мин

0

233

Сурет: ЖИ көмегімен

Президент Қасым-Жомарт Тоқаев көші-қон саласын жаңғыртуға бағытталған заңнамалық түзетулерге қол қойды. Жаңа нормаларға сәйкес, Қазақстанға келетін шетел азаматтары үшін міндетті кіру алымы енгізіліп, елге кіру рәсімі цифрлық форматқа көшіріледі, — деп хабарлайды Dauletten.kz.

Қазақстанда көші-қон жүйесін толық цифрландыру көзделіп отыр. Осыған байланысты мемлекеттік шекарадан өту тәртібіне бірқатар маңызды өзгеріс енгізілді.

Жаңа заң аясында үш негізгі тетік іске қосылады: электронды кіру рұқсаты, иммигранттың цифрлық профилі және шетел азаматтары туралы мәліметтер сақталатын бірыңғай орталық база. Барлық ақпарат бір цифрлық платформаға біріктіріледі.

Сонымен қатар, Қазақстанға келетін шетел азаматтары үшін міндетті кіру алымы енгізіледі. Оның нақты мөлшерін Қазақстан Үкіметі белгілейді.

Жаңа цифрлық жүйені мемлекеттік қатысу үлесі басым арнайы оператор басқаратын болады. Бастама көші-қон үдерістерін ашық әрі тиімді басқаруға, сондай-ақ мемлекеттік қызметтердің сапасын арттыруға бағытталған.