Жаңалықтар

Шымкентте полицейлер алаяқтарға алданып қалған тұрғынның ақшасын қайтарып берді

14.05.2026

мин

0

53

Шымкентте интернет алаяқтарының құрбаны болған тұрғын полиция көмегімен жоғалтқан 1,7 миллион теңгесін толықтай қайтарып алды, — деп хабарлайды Dauletten.kz.

Шымкент қаласының тұрғыны телефон алаяқтарының арбауына түсіп қалған. Алдымен оған өзін «Қазпошта» қызметкері ретінде таныстырған белгісіз адам хабарласып, келген SMS-хабарламадағы кодты айтуды сұраған. Тұрғын оның сөзіне сеніп, кодты айтып берген.

Біраз уақыттан кейін тағы бір адам қоңырау шалып, өзін банк қызметкері ретінде таныстырған. Ол тұрғынды ақшасын «қауіпсіз есепшотқа» аудару қажет екеніне сендірген.

Алаяқтардың айтқанына ерген тұрғын банкомат арқылы шотындағы қаражатты шешіп алып, көрсетілген есепшотқа аударған. Кейін өзінің алаяқтардың құрбаны болғанын түсініп, полициядан көмек сұраған.

Тәртіп сақшылары жедел әрекет етіп, ақша аударылған есепшоттарды анықтаған. Сондай-ақ транзакциялар уақытылы бұғатталып, нәтижесінде 1,7 миллион теңге толықтай иесіне қайтарылды.

Полиция азаматтарды сақ болуға шақырады. Мамандар бейтаныс адамдарға сенбеуге, SMS-кодтарды, жеке мәліметтер мен банк картасының деректерін ешкімге бермеу керектігін ескертті.