Жаңалықтар

Телефон арқылы "гипноз": Ақыл-есі бүтін адам алаяқтың арбауына қалай түседі?

01.08.2025

1 мин

0

535

Сурет: tegrk.ru

Экономист Айдархан Құсайынов өзінің авторлық Telegram-арнасында ерекше оқиға жайлы бөлісіп, қоғамда көп айтыла бермейтін, бірақ аса маңызды қауіпке назар аударады, - деп хабарлайды Dauletten.kz.

Шынымен де, телефон арқылы адам гипнозға түсе ме?

Соңғы уақытта алаяқтықтың түрі көбейіп, күрделене түсті. Қылмыскерлер технология мен психологияны ұштастырып, қарапайым азаматтарды түрлі айламен алдап, күрделі схемаларға оңай тартып жүр.

Құсайыновтың жазбасында келтірілген оқиға — кез келген адамның басынан өтуі мүмкін жағдай. Енді соған тоқталайық.

Ақыл-есі дұрыс, есі бүтін ересек адам құлағында наушникпен жүріп, бейтаныс нөмірден қоңырау қабылдайды. Әңгіме барысында санасы тұманданып, бірнеше сағат бойы өз әрекетін бақылай алмай қалады.

Кейін есін жиып, өз жүріс-тұрысын бейнебақылау арқылы көріп, таң қалады: банкке барыпты, телефон арқылы әлдекіммен сөйлесіп жүріп, оның айтқанын бұлжытпай орындаған. Алаяқтың нұсқауымен кредит рәсімдеп, алған ақшаны үшінші тұлғаға аударып жіберген.

Сырт көзге бұл адам бәрін өз еркімен істеп жүргендей көрінеді. Алайда автор мұны гипнозбен байланыстырады. Оның пікірінше, бұл тәсілге қарсы тұру қиын: саналы адам өзі үшін тиімсіз әрекеттерге қалайша барады? Мұндай оқиғалар – сол сұраққа жауап секілді.

Қалай қорғануға болады?

Құсайыновтың ұсынысы қарапайым, бірақ ескеруге тұрарлық:

• Бейтаныс нөмірден қоңырау түскенде, жауапты тек дауыс зорайтқыш (громкая связь) арқылы берген дұрыс.
• Наушникпен немесе телефонды құлаққа тақап сөйлесу – қауіп төндіруі мүмкін. Құлақ түбіндегі дауыс пен үркітуші сөздер адамның санасына тікелей әсер етіп, оны басқаруға жол ашуы ықтимал.

Бұл тәсілдің ғылыми дәлелі болмаса да, ми қабылдайтын сигналдың сипаты өзгеше болуы мүмкін. Бұл — тек жорамал. Бірақ сақтанған — аман.

Алаяқтықтың бұл түрі кеңінен айтылмаса да, өмірде кездесетінін ұмытпау керек. Ақпараттық қауіпсіздік тек техникалық құралдармен шектелмейді — психологиялық беріктік те маңызды.

Сондықтан, достар, бейтаныс қоңырауларға сақтықпен қарап үйренейік. Әсіресе, асығыс шешім қабылдаудан аулақ болайық. Эмоцияға ерік берсек, өзімізді бақылаудан айырылып қалуымыз мүмкін. Қазіргі алаяқтар ақшаны емес, алдымен сана-сезімді нысанаға алуда. Сол себепті кез келген қоңырауға тек құлақпен емес, парасатпен жауап берген жөн.