|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Мемлекет басшысы Қазақстан халқы Ассамблеясының ХХХІV сессиясында сөйлеген сөзінде тіл мәселесін желеу етіп қоғамда алауыздық тудыруға бағытталған кез келген әрекетке заң аясында қатаң тосқауыл қойылатынын айтты, - деп хабарлайды Dauletten.kz.
Президенттің мәлімдеуінше, қазіргі таңда түлектердің шамамен 80 пайызы Ұлттық бірыңғай тестілеуді мемлекеттік тілде тапсырады. Сондай-ақ биыл алғаш рет мектепке баратын балалардың 70 пайыздан астамы қазақ тілінде білім алмақ.
- Елімізде ешкім азаматты немесе мінберде сөз сөйлеп тұрған адамды белгілі бір тілде сөйлеуге мәжбүрлеуге тиіс емес. Тіл мәселесін сылтау етіп, ел ішіндегі тұрақтылықты бұзуға тырысатын кез келген әрекет заңмен жазаланады. Бұл бағытта шетелде отырып, түрлі ұйымдардың қаржылай қолдауымен деструктивті әрекетке барған арандатушылар да назардан тыс қалмайды, – деді Қасым-Жомарт Тоқаев.
Оның айтуынша, өткен жылы Ұлттық құрылтай отырысында мемлекетіміздің басты құндылықтары ретінде бірлік, отаншылдық, тәуелсіздік және келісім атап көрсетілген.
- Сондықтан тағы да ерекше атап өткім келеді: ел ішіндегі татулық пен тұрақтылыққа сызат түсіргісі келетіндер заң алдында қатаң жауап береді. Ал керісінше, бірлік пен ынтымақты нығайтуға атсалысып жүрген азаматтар әрдайым ерекше құрметке ие болады, – деп түйіндеді мемлекет басшысы.
