Жаңалықтар

ҰБТ мен ЖОО-ға түсуге уәде берген күдікті Албанияда ұсталды

29.06.2026

мин

0

103

Сурет: Ғаламтордан

Албанияда ұсталған Қазақстан азаматы елге жеткізілді. Тергеу мәліметінше, ол ҰБТ-ға дайындау және жоғары оқу орнына оқуға түсіруге уәде беріп, ондаған азаматты алдап кеткен, — деп хабарлайды Dauletten.kz.

Қазақстанның Бас прокуратурасы мен Ішкі істер министрлігінің Интерпол ұлттық орталық бюросы халықаралық іздеуде жүрген қазақстандықты елге қайтарды.

Тергеу нұсқасына сәйкес, күдікті 2022–2023 жылдары интернет арқылы жоғары сынып оқушыларына Ұлттық бірыңғай тестілеуге сапалы дайындық ұйымдастыратынын және жоғары оқу орындарына кепілдікпен оқуға түсіретінін айтып, ақылы қызмет ұсынған. Алайда уәде етілген қызмет көрсетілмей, азаматтардың ақшасы иемденілген.

Құқық қорғау органдарының мәліметінше, күдіктінің әрекетінен 32 адам зардап шеккен. Ал келтірілген материалдық шығынның жалпы көлемі 28 миллион теңгеден асқан.

Оқиғадан кейін күдікті тергеуден бой тасалап, халықаралық іздеуге жарияланған. Ол 2025 жылдың мамыр айында Албания аумағында ұсталып, кейін Қазақстанға экстрадицияланды.

Қазіргі уақытта күдікті тергеу изоляторына қамалып, оған қатысты сотқа дейінгі тергеу жалғасып жатыр.

Аталған қылмыс дәлелденген жағдайда оның мүлкі тәркіленіп, үш жылдан он жылға дейін бас бостандығынан айырылуы мүмкін.