Жаңалықтар

Ұстаздарға біліктілік санаты үшін жалақысына қанша үстеме ақы төленеді?

03.10.2023

1 мин

2

1250

Еліміздің мектептерінде 350 мыңнан аса педагог еңбек етеді. Оның 220 мыңнан астамына аттестация қорытындысы бойынша тағайындалған біліктілік санаты үшін жалақысына үстеме ақы төленеді, деп хабарлайды Dauletten.kz.

Оқу-ағарту министрлігінің мәліметінше, педагог-шеберге 50%, педагог-зерттеушіге 40%, педагог-сарапшыға 35%, педагог-модераторға 30% үстеме ақы қосылады. Еліміз бойынша барлығы 73 мың 820 педагог-модератор, 81 мың 168 сарапшы, 71 мың 141 зерттеуші, 3 мың 482 шебер бар.

Мемлекет басшысының тапсырмасы бойынша 4 жыл ішінде педагогтердің жалақысы 100%, яғни 2 есе артты. Сондай-ақ 2023 жылдың 1 қыркүйегінен бастап мектепке дейінгі тәрбие мен білім беру педагогтерінің еңбекақысы 30% көбейген.

Сондай-ақ 2022 жылдан бастап жалпы білім беретін пәндер бойынша халықаралық олимпиадалардың жеңімпаздары мен жүлдегерлерін дайындаған мұғалімдерге келесі мөлшерлерде біржолғы сыйақы беріледі:

• l дәрежелі диплом және алтын медаль иегерін дайындаған педагогке – базалық жалақының 26,5 еселенген мөлшері;
• ІІ дәрежелі диплом және күміс медаль иегерін дайындаған педагогке – базалық жалақының 17,5 еселенген мөлшері;
• ІІІ дәрежелі диплом және қола медаль иегерін дайындаған педагогке – базалық жалақының 8,5 еселенген мөлшері.