Жаңалықтар

Зайсан көлінде балықшылар мінген қайық аударылып, екі адам іздестіріліп жатыр

18.09.2026

мин

0

51

Сурет: Ғаламтордан

Шығыс Қазақстан облысының Тарбағатай ауданында балық аулауға шыққан үш адамның екеуі Зайсан көлінде суға кеткен. Құтқарушылар оларды екінші күн қатарынан іздеп жатыр, — деп хабарлайдя Dauletten.kz.

Шығыс Қазақстан облысының Тарбағатай ауданында Зайсан көлінде қайғылы жағдай болды. Балық аулауға шыққан үш адамның мінген қайығы су үстінде аударылып, екі адам суға кеткен.

Оқиға кезінде балықшылардың біреуі жағаға өз күшімен жүзіп жеткен. 58 жастағы ер адамға жағалаудағы жергілікті тұрғындар көмек көрсеткен. Ал оның екі серігі әзірге табылған жоқ.

Қазір көлде екінші күн қатарынан ауқымды іздеу операциясы жүріп жатыр. Құтқарушылардың жұмысына Төтенше жағдайлар департаментінің мамандары ғана емес, жергілікті тұрғындар да атсалысуда.

Іздеу барысында катерлер, басқа да жүзу құралдары мен дрондар қолданылып жатыр. Мамандар көлдің аумағын бірнеше бағыт бойынша тексеруде.

ШҚО ТЖД баспасөз хатшысы Марина Лискова іздеу жұмыстарына жергілікті тұрғындардың да қайықпен қосылғанын айтты.

«Іздеу жұмысына Төтенше жағдайлар департаментінің күштері мен құралдары жұмылдырылды. Атап айтқанда, жүзу құралдары, дрондар мен катерлер пайдаланылып жатыр. Сонымен қатар іздеу жұмысына қайықпен жергілікті тұрғындар да қатысуда», – деді Марина Лискова.

Оқиғаға қатысты назар аударарлық жайттың бірі – балықшылардың құтқару кеудешесін кимегені. Бұл олардың суға құлаған кездегі қауіпсіздік деңгейін айтарлықтай төмендеткен болуы мүмкін.

Бұған қоса, оқиға алдында өңірде дауылды ескерту жарияланғаны белгілі болды. Яғни көлге шыққан кезде ауа райы жағдайы да қауіп факторларының бірі болған.

Қазір негізгі міндет – суға кеткен екі адамды мүмкіндігінше тез табу. Іздеу жұмыстары жалғасып жатыр.