Жаңалықтар

Жазғы лагерьлерге қойылатын талаптар күшейді

21.05.2026

мин

0

96

Сурет: GOV.kz

Оқу-ағарту министрлігі балалар лагеріне арналған жаңа жүйені енгізді, — деп хабарлайды Dauletten.kz. 

Қазақстанда балалар сауықтыру лагерьлерінің жұмысына қатысты жаңа тәртіп күшіне енді. 2026 жылдың 1 сәуірінен бастап балалар демалысын ұйымдастыратын орталықтар лицензия алуы міндеттелді. Бұл бастама балалардың қауіпсіздігін қамтамасыз етіп, көрсетілетін қызмет сапасын арттыруды көздейді.

Оқу-ағарту министрлігінің мәліметінше, лицензия бес жыл мерзімге беріледі. Мұндай шешім мекемелерге түсетін артық әкімшілік жүктемені азайтып, құжаттарды жиі жаңартпауға мүмкіндік береді. Сонымен қатар мемлекеттік бақылау жүйелі түрде жүргізіледі.

Жаңа талап бойынша балалар лагерьлері бірнеше негізгі стандартқа сай болуы қажет. Атап айтқанда, орталықтарда білім беру және сауықтыру бағдарламалары болуы, білікті мұғалімдер мен медицина қызметкерлері жұмыс істеуі тиіс. Сондай-ақ санитарлық талаптар сақталып, қауіпсіздік жүйелері толық қамтамасыз етілуі қажет.

Министрлік өкілдері бұл өзгерістер талапқа сай келмейтін бейресми ұйымдардың жұмысын шектеуге ықпал ететінін айтады. Нәтижесінде ата-аналар үшін балаларын сенімді әрі қауіпсіз орындарға жіберуге мүмкіндік артады.

Қазіргі уақытта өңірлерде жазғы маусымға дайындық жүріп жатыр. Арнайы құрылған комиссиялар лагерьлердің жағдайын тексеріп, олардың талаптарға сәйкестігін бағалауда. Ал лицензия беру жұмыстарын білім сапасын қамтамасыз ету департаменттері жүзеге асырып жатыр.

Ведомствоның айтуынша, қабылданған шаралар балалардың сапалы демалысын ұйымдастырып қана қоймай, еліміздегі сауықтыру қызметтеріне ортақ талап қалыптастыруға негіз болады.