Жаңалықтар

Жоғалған қозғалтқыш апатқа ұшыраған ұшақтан табылды: Bek Air иесі Нұрлан Жұмасұлтанов ұсталды

16.09.2026

мин

0

57

Сурет: inbusiness.kz

2019 жылы адам өлімімен аяқталған әуе апатына ұшыраған Bek Air ұшағынан кезінде жоғалған қозғалтқыш табылды. Осы оқиғаға байланысты әуе компаниясының іс жүзіндегі қожайыны Нұрлан Жұмасұлтановқа «аса ірі мөлшерде ұрлық жасады» деген айып тағылып, ол екі айға қамауға алынды, — деп хабарлайды Dauletten.kz.

Алматы халықаралық әуежайында сақтаулы тұрған Fokker-100 ұшақтарының қозғалтқыштары жоғалғаннан кейін арнайы іс қозғалған еді. Ұзақ уақыт бойы күдіктілерді анықтау мүмкін болмады, өйткені оқиға орнынан бейнежазбалар да, куәгерлер де табылмаған.

Дегенмен, кейінірек сериялық нөмірлерін салыстыру барысында, жоғалған бөлшектердің бірі 2019 жылғы желтоқсанда апатқа ұшыраған Bek Air кемесіне орнатылғаны белгілі болды.

Тергеу материалдарына сәйкес, консервацияда тұрған ұшақтың қозғалтқышы заңсыз шешіп алынып, компания пайдаланып жүрген басқа әуе кемесіне қойылған.

Бастапқыда бұл істі Көліктегі полиция департаменті шетелдік мамандармен бірге зерттеген еді. Кейін Бас көлік прокуратурасы істі Ұлттық қауіпсіздік комитетіне тапсырды. ҰҚК өкілдері заңсыз құралдың Bek Air бортында болуын негіз етіп, әуе компаниясының басшылығы мен иелерін тексеруге кірісті.

Нәтижесінде кәсіпкер Нұрлан Жұмасұлтанов жауап алуға шақырылып, кейін ұсталды. 9 қыркүйекте Алматының тергеу соты оны екі айға қамауда ұстау туралы шешім қабылдады. Сол іс бойынша тағы бір азамат үйқамаққа жіберілді.

Қазіргі уақытта Жұмасұлтановқа Қылмыстық кодекстің 188-бабы 4-бөлігі бойынша айып тағылып отыр. Егер оның кінәсі дәлелденсе, мүлкі тәркіленіп, 5 жылдан 10 жылға дейін бас бостандығынан айырылуы мүмкін.

Еске сала кетейік, 2019 жылдың 27 желтоқсанында Алматыдан елордаға бағыт алған Bek Air ұшағы биіктік жинай алмай, жеке тұрғын үйге соғылған еді. Қайғылы оқиға салдарынан 13 адам қаза тапты.

Кейін бұл апатқа ұшқыштар ұжымы кінәлі деп танылып, қайтыс болғаннан соң сотталған болатын. Ал Нұрлан Жұмасұлтановқа қатысты тағылған айыптар әлі тергеу сатысында, оның кінәсі сот үкімімен толық дәлелденген жоқ.