Жаңалықтар

Air Astana бірінші жартыжылдықты шығынмен қорытындылады

06.08.2026

мин

0

164

Сурет: ғаламтордан

Air Astana әуе компаниясы 2026 жылдың алғашқы алты айын 21,2 млн АҚШ доллары көлеміндегі таза шығынмен аяқтады. Өткен жылдың осы кезеңінде тасымалдаушы 10,7 млн доллар көлемінде пайда көрсеткен болатын, - деп хабарлайды Dauletten.kz.

Соған қарамастан компанияның кірісі өсім көрсетті. Бірінші жартыжылдықтағы жалпы табыс 16,1 пайызға артып, 763,9 млн долларға жеткен. Ал екінші тоқсандағы кіріс өткен жылдың сәйкес кезеңімен салыстырғанда 18,3 пайызға ұлғайып, 433 млн долларды құрады. Алайда осы тоқсанда қаржылық нәтиже оң көрсеткішке шыға алмай, шамамен 100 мың доллар шығын тіркелді.

Компанияның қаржылық көрсеткіштеріне бірқатар фактор әсер еткен. Атап айтқанда, қызметкерлерге төленетін шығындар, әуе кемелеріне техникалық қызмет көрсету және оларды пайдалану шығындары артқан. Бұған қоса, Pratt & Whitney қозғалтқыштарындағы ақауларды жоюға қосымша қаражат жұмсалған.

Сондай-ақ Air Astana мәліметінше, халықаралық әуежайларда авиациялық отынның орташа бағасы бір жыл ішінде 98 пайызға қымбаттаған.

Осыған қарамастан, компания даму жоспарын жалғастырып отыр. 2030 жылға дейін әуе паркін қазіргі 63 ұшақтан 86 ұшаққа дейін ұлғайту көзделген. Сонымен қатар алғашқы Boeing 787-9 лайнерін 2026 жылдың соңына дейін қабылдау жоспарланған.