Жаңалықтар

Ақылы жолдардағы қозғалыс: Қазақстанда қай бағыттар көш бастап тұр?

09.11.2026

0 мин

0

114

Сурет: ЖИ

Қазақстанда 2026 жылдың алғашқы он айында ақылы автомобиль жолдары арқылы 68,3 миллион рет көлік өткен. «ҚазАвтоЖол» ұлттық компаниясы қаңтар-қазан айларының қорытындысы бойынша еліміздегі ең көп пайдаланылатын ақылы жолдардың рейтингін жариялады, - деп хабарлайды Dauletten.kz.

Рейтингке республикалық маңызы бар 28 ақылы жол учаскесі енген. Көш басында Алматы – Қонаев тасжолы тұр. Бұл бағытта он ай ішінде 10 834 980 жүріп өту дерегі тіркелген.

Екінші орында Шымкент – Өзбекстан шекарасы бағыты орналасқан. Аталған жол арқылы 8 033 519 рет көлік өткен. Үшінші орынға 5 652 809 көрсеткішпен Шымкент – Тараз тасжолы жайғасқан.

Ал алғашқы бестікті Тараз – Қайнар (4 964 599) және Шымкент – Қызылорда (4 061 676) бағыттары түйіндейді.

Бір қызығы, еліміздегі ақылы жолдар арқылы тіркелген барлық жүріп өтудің жартысына жуығы небәрі бес бағытқа тиесілі. Атап айтқанда, осы жолдарда 33,5 миллион жүріп өту тіркелген. Бұл жалпы көрсеткіштің 49,1 пайызын құрайды.

Орталық және солтүстік өңірлердегі ақылы жолдар да белсенді пайдаланылып келеді. Мәселен, Астана – Теміртау бағытында 3 698 981, Астана – Щучинск жолында 3 407 291, ал Қонаев – Талдықорған тасжолында 3 193 009 жүріп өту тіркелген.

Сонымен қатар Таразды айналып өту жолында (Қайнар – Шымкент) 2 526 954, Щучинск – Көкшетау бағытында 2 446 971 жүріп өту есепке алынған.

Осылайша ең көп пайдаланылатын он ақылы жолға 48,8 миллион жүріп өту тиесілі. Бұл ел бойынша тіркелген жалпы көрсеткіштің 71,5 пайызына тең.

Рейтингтің келесі орындарында Қостанай – Денисовка, Алматы – Қорғас, Астана – Павлодар, Қарағанды – Балқаш – Бурылбайтал, Қызылорда – Арал және Көкшетау – Петропавл бағыттары орналасқан. Бұл жолдардың әрқайсысында 1,5 миллионнан 2,3 миллионға дейін жүріп өту тіркелген.

Ал Павлодар – Семей – Қалбатау және Ақтөбе – Ресей шекарасы (Орынбор) бағыттарындағы көрсеткіш 1,1 миллионнан асқан.

Рейтингтің соңғы орындарында Бурылбайтал – Күрті және Бейнеу – Ақжігіт бағыттары тұр. Бұл жолдарда тиісінше 264 253 және 130 616 жүріп өту тіркелген.

Жарияланған мәліметтерге сүйенсек, Қазақстандағы көлік қозғалысының басым бөлігі оңтүстік және оңтүстік-шығыс бағыттарда шоғырланған. Бұл жолдар ірі қалаларды, маңызды көлік тораптарын және халықаралық автомобиль дәліздерін байланыстырады.

Айта кетейік, статистикада автокөліктердің нақты саны емес, ақылы жолдар арқылы жүріп өту саны есептелген. Яғни бір көлік белгілі бір жолмен бірнеше рет жүрсе, оның әр сапары жеке тіркеледі. Сондықтан 68,3 миллион көрсеткіші дәл осынша автокөлік ақылы жолдарды пайдаланғанын білдірмейді.