Жаңалықтар

Алматыдағы LRT-ның іске қосылатын мерзімі белгілі болды

15.07.2026

мин

0

79

Сурет: BAQ.kz

Алматыда LRT жобасын іске асыру жұмыстары жалғасып жатыр. Қала әкімдігі 2027 жылдың соңына қарай жеңіл рельсті көлік желісін пайдалануға беруді жоспарлап отыр. Жоба Астанадағы LRT-дан бірқатар технологиялық ерекшелігімен өзгеше болмақ, — деп хабарлайды Dauletten.kz.

Алматыда жеңіл рельсті көлік (LRT) желісін салуға дайындық жұмыстары қарқынды жүргізілуде. Алматы жол инфрақұрылымын дамыту департаментінің мәліметінше, жобаны 2027 жылдың соңында пайдалануға беру жоспарланған.

Қазіргі уақытта мамандар ескі трамвай рельстері мен асфальт жабынын бөлшектеп, жаңа көлік жүйесіне қажетті инфрақұрылымды дайындап жатыр.

Алғашқы LRT бағыты Алатау ауданындағы индустриалды аймақты қала орталығымен және Алматы-2 теміржол вокзалымен байланыстырады. Желінің ұзындығы 18 шақырымды құрайды және онда 34 аялдама салынады. Әр пойыз 285 жолаушыға дейін тасымалдай алады, ал оның орташа қозғалыс жылдамдығы сағатына 35 шақырымға дейін жетеді.

Жобаның басты ерекшелігі – Алматыдағы LRT негізінен жер үстімен жүреді және көпдеңгейлі эстакадалар аз салынады. Сонымен қатар пойыздар дәстүрлі әуе электр желілеріне тәуелді болмайды.

Департамент басшысының орынбасары Асан Бостановтың айтуынша, қазіргі таңда пойыздардың өз аккумуляторлары арқылы қозғалып, станцияларда қуатталуын қамтамасыз ететін заманауи технологиялар қарастырылып жатыр. Бұл қала көшелеріндегі әуе электр желілерінің санын азайтып, инфрақұрылымды ықшам етуге мүмкіндік береді.

Мамандардың пікірінше, жаңа LRT желісі Алматыдағы қоғамдық көлік жүйесін жаңғыртып, жолаушылардың қатынасын жеңілдетуге және жолдағы жүктемені азайтуға ықпал етуі тиіс.