Жаңалықтар

Қараша айының салық күнтізбесі: декларация өткізу және төлем жасау мерзімдері

27.10.2026

мин

0

118

Сурет: gov.kz

Қараша айы бизнес пен салық төлеушілер үшін аса қарбалас кезең болмақ. Бұл айда ондаған есептілік түрін тапсырып қана қоймай, бюджетке міндетті төлемдерді уақытылы аудару қажет. Мамандар соңғы күнді күтпей, құжаттарды алдын ала өткізуге үндеп отыр, — деп хабарлайды Dauletten.kz.

Қараша айында ел тұрғындары мен кәсіпкерлерді маңызды қаржылық міндеттемелер күтіп тұр. Кейбір есептер айдың ортасына қарай тапсырылса, айдың соңына қарай бірқатар салықтарды төлеу мерзімі жаппай аяқталады. Мемлекеттік кірістер департаменті салық төлеушілерге жүйедегі техникалық кедергілер мен өсімпұлдардың алдын алу үшін соңғы сәтке дейін созбауға кеңес береді.

Басты мерзімдер: Есептіліктерді өткізу кестесі

Кәсіпкерлер мен ұйымдар үшін III тоқсанның қорытындысы бойынша негізгі декларацияларды тапсырудың бірінші толқыны 16 қарашаға дейін белгіленген. Бұл тізімге мыналар кіреді:

 КТС пен ЖТС есептері: Резиденттер мен бейрезиденттердің табысынан ұсталған корпоративтік табыс салығы (101.03, 101.04 нысандары), сондай-ақ жеке табыс салығы мен әлеуметтік салық декларациясы (200.00).

 ҚҚС және акциздер: Қосылған құн салығының декларациясы (300.00) және қыркүйек айының акциз есебі (400.00).

 Арнайы төлемдер мен жер қойнауы: Роялти, өндіру бонусы, жер қойнауын пайдаланушылардың төлемдері (500.00, 510.00), ойын бизнесі мен цифрлық майнингке қатысты есептер (710.00, 880.00).

 Мүлік және экология: Мүлік салығының ағымдағы төлемдері (701.01), су ресурстары мен қоршаған ортаға әсер үшін төлемақы декларациялары (860.00, 870.00).

Ал 20 қарашаға дейін қазан айындағы ЕАЭО шеңберіндегі импорт пен ҚҚС (328.00), акциздер, сондай-ақ жер учаскелерін пайдаланғаны үшін есептеулер (851.00) тапсырылуы тиіс.

Қарашада қандай төлемдерді жасау керек?

Ай бойы әр апта сайын жекелеген санаттар бойынша төлем жасау күндері көрсетілген:

 5 қараша: Жеке практикамен айналысатындардың қазан айындағы ЖТС төлемі.

 10 қараша: Шаруа қожалықтарының АСР бойынша есептелген ЖТС және су төлемі.

 16 қараша: Интернет-платформалар арқылы жұмыс істейтін өзін-өзі жұмыспен қамтитындардың ЖТС-ы.

 20 қараша: ЕАЭО ҚҚС, акциздер және эко-төлемдер.

 24 қараша: Бейрезиденттердің табысынан ұсталатын ЖТС.

25 қараша – қаржылық күн:

Бұл күні бірден ондаған төлем түрі қатар орындалуы тиіс. Олардың қатарында КТС аванстық төлемдері, жалдамалы қызметкерлер мен өзін-өзі жұмыспен қамтығандардың ЖТС-ы, III тоқсанның ҚҚС-ы, әлеуметтік салық, мүлік пен жер салығы, сондай-ақ бірыңғай төлемдер мен барлық міндетті әлеуметтік аударымдар (МЗЖ, МКЗЖ, МӘМС және т.б.) бар.

Салық органдары кәсіпкерлер мен азаматтарды қателіктер мен айыппұлдардан сақ болу үшін есеп-қисапты дер кезінде орындауға шақырады.