Жаңалықтар

2027 жыл «Жалпыхалықтық ауқымды құрылыс жылы» деп жарияланды

28.10.2026

мин

0

81

Мемлекет басшысы Қасым-Жомарт Тоқаев Қазақстан халқына Жолдауында 2027 жылды «Жалпыхалықтық ауқымды құрылыс жылы» деп жариялауды ұсынды. Ел аймақтарында жолдар, әуежайлар, мектептер, ауруханалар мен спорт кешендері жаппай салынып, жөндеуден өтеді, — деп хабарлайды Dauletten.kz.

Қазақстанда азаматтық инфрақұрылымды түбегейлі жаңғыртуға бағытталған ауқымды жұмыстар басталады. Мемлекет басшысы елді мекендерде, аудандар мен облыс орталықтарында маңызды әлеуметтік нысандардың құрылысын жеделдету қажеттігін атап өтті.

Президенттің айтуынша, басты назар азаматтардың тұрмыс сапасын арттыруға және өңірлерді кешенді дамытуға аударылады. Осыған орай, алдағы кезеңде атқарылатын жұмыстар тізімі кеңеймек.

Негізгі бағыттар мен жоспарланған нысандар:

 Көлік инфрақұрылымы: Жаңа жолдар төселіп, әуежайлар мен вокзалдар қайта жаңғыртылады.

 Әлеуметтік-медициналық орталықтар: Денсаулық сақтау мекемелерімен қатар, ерекше қажеттілігі бар балаларға арналған арнайы оңалту орталықтары салынады.

 Мәдениет және спорт: Барлық өңірде спорт кешендері, шығармашылық үйлері, кітапханалар және заманауи ғылыми орталықтар бой көтереді.

 Тұрғын үй құрылысы: Халықты баспанамен қамту мәселесі бұрынғыдай басты назарда қала береді.

Президенттің бұл бастамасы ел өңірлерінің әлеуметтік әлеуетін арттырып қана қоймай, жаңа жұмыс орындарын ашуға және экономикалық өсімге қатты серпін бермек.

- Атап айтқанда, жолдар, әуежайлар, вокзалдар, денсаулық сақтау мекемелері, соның ішінде ерекше қажеттілігі бар балаларға арналған оңалту орталықтарының құрылысын бастау қажет. Барлық аймақта шығармашылық үйлері, спорт кешендері, кітапханалар және ғылыми орталықтар бой көтеруі керек. Әрине, тұрғын үй салу да маңызды міндет болып қала береді, - деді Президент.